LA RUBRICA
Ognidun di nô, a cjase sô, al à stabilît regulis

Sabato 16 Febbraio 2019
LA RUBRICA
Ognidun di nô, a cjase sô, al à stabilît regulis che, par solit, ducj a rispietin: la breute dal water par solit si lasse nete e sbassade; prin di jentrâ de puarte si à di russâ ben lis scarpis sul tapêt; lis cjadreis e il sofà a son fats par sentâsi o par distirâsi e no di sigûr par poiâi parsore lis scarpis; il zardin nol à di jessi doprât tant che une scovacere, si che la jerbe taiade e lis fueis dal morâr a van ingrumadis par ben intun sac e si àn di puartâ inte discjarie, no butadis intal fossâl di chel dongje. Susane e à cirût intal timp di fâ in mût che, sedi l'om che lis fiis, a imparassin a rispietâ chel che, secont jê, al varès di jessi un compuartament just, che se doprât a cjase al sarès vignût naturâl ancje fûr. Flât spaçât: cuant che l'om al tire dongje lis fueis, mai une volte che al vedi pensât di vierzi il portonut e di netâ ancje il marcjepît e la canalete in bande de strade, stant che lis fueis a svolin dapardut. La sô frute piçule e à cjapât la multe sul tren par vie che e tignive i scarpons ben poiâts su la sente denant. Chê altre fie, che e ten la sô machine lustre tant che un spieli, cuant che e monte ta chê di sô mari, o in chê dal pari, no si preocupe di no vê pantan sot des scarpis, ni si fâs un probleme a butâ dulintor cjartis e cjartutis di caramelis o, piês, di cincingomis za mastiadis. Chê altre sere, tornant a cjase a piduline, e je passade pal parcut e e à butât il voli a di un grup di fantaçuts ducj sentâts sul schenâl di une bancjute e cu lis scarpis poiadis su la sente indulà che, par solit, al sta il cûl di chei altris, clamâts normâi. Cun smare, e à pensât che cheste ande si le à soredut cuant che si à a ce fâ cun chel nol è nestri, e ancje cuintri il nestri di ducj, almancul fin cuant che alc nol devente par nô impuartant o necessari. (Cu la colaborazion de Arlef Agjenzie Regjonâl pe Lenghe Furlane).
© RIPRODUZIONE RISERVATA
© RIPRODUZIONE RISERVATA

PIEMME

CONCESSIONARIA DI PUBBLICITÁ

www.piemmemedia.it
Per la pubblicità su questo sito, contattaci